HÖFUNDAMÓT

höfundur - sögupersónur – lesandi

 Lily King  les upp úr bók sinni Sæluvíma á ensku og Hallgrímur Helgason les uppúr bók sinni 60 kg af sólskini

Þrír lesendur, fulltrúar lesklúbbsins Les – endur, segja frá upplifun, skoðun og áhrifum þeim sem bókin hafði á þá og leita svara við spurningum sínum beint til höfundanna.

Viðburðurinn fer fram á ensku og íslensku.

1862 Nordic Bistro býður uppá sérstakt hádegisverðartilboð af þessu tilefni.

Lily King 

Bandaríska rithöfundinn Lily King þekkja margir sem höfund hinnar vinsælu og margverðlaunuðu Euphoria sem kom út hér síðasta vor undir nafninu Sæluvíma í þýðingu Ugga Jónssonar. King ólst upp í Massachusetts í Bandaríkjunum og er með B.A. gráðu í enskum bókmenntum og M.A. gráðu í skapandi skrifum frá Háskólanum í Syracuse. Hún hefur kennt bæði ensku og skapandi skrif við háskóla víða um heim.

Fyrsta skáldsaga King, The Pleasing hour, kom út árið 1999 og hlaut afar góðar viðtökur bæði hjá gagnrýnendum og lesendum. Sömu sögu má segja um næstu bækur hennar, The English Teacher (2005) og Father of the Rain (2010). Sæluvíma sem kom svo út árið 2014, sló algjörlega í gegn, rataði inn á marga lista yfir bestu bækur ársins og fékk fjöldamörg verðlaun.

Hallgrímur Helgason

Hallgrímur Helgason er fæddur  18. febrúar 1959. Hann lærði myndlist í Reykjavík og München og hefur frá árinu 1982 starfað sjálfstætt sem myndlistarmaður og rithöfundur. Hann hefur haldið yfir 20 einkasýningar hér heima, í Boston, New York, París og Malmö og verk hans hafa verið sýnd á yfir 30 samsýningum í ýmsum löndum.

Fyrsta skáldsaga Hallgríms, Hella, kom út árið 1990 og síðan hefur hann sent frá sér allmargar skáldsögur sem vakið hafa athygli og hlotið ýmsar viðurkenningar. Kunnustu bækur Hallgríms eru 101 Reykjavík, sem var kvikmynduð, Höfundur Íslands, sem fékk Íslensku bókmenntaverðlaunin árið 2001, og Rokland, sem einnig var kvikmynduð. Sú fyrstnefnda og síðastnefnda voru tilnefndar til bókmenntaverðlauna Norðurlandaráðs og sömuleiðis skáldsagan Konan við 1000 gráður, sem út kom 2011. Sú bók var einnig tilnefnd til Íslensku bókmenntaverðlaunanna og hefur komið út í allmörgum löndum. Frá námsdvöl sinni í München segir hann í bókinni Sjóveikur í München, sem kom út 2015 og var tilnefnd til Íslensku bókmennntaverðlaunanna.

Bók Hallgríms, 10 ráð til að hætta að drepa fólk og byrja að vaska upp, hefur komið út á ýmsum tungumálum, naut mikillar velgengni á meginlandi Evrópu og var sett þar á svið. Þá hefur Hallgrímur sent frá sér úrval kvæða, Ljóðmæli 1978-1998, og skrifað nokkur verk fyrir leikhús.

BÓKASALA

Penninn Eymundsson er með bækur höfundanna sem taka þátt í Bókmenntahátiðinni á Akureyri og í Reykjavík til sölu í Hofi þennan dag.

Bókmenntahátíð á Akureyri er samstarfsverkefni Menningarfélags Akureyrar og Amtsbókasafnsins á Akureyri við Bókmenntahátíð í Reykjavík