Sýningar vetrarins

Leikár æskunnar

Leikár Leikfélags Akureyrar er tileinkað æskunni. Það er metnaður okkar að fá ungu kynslóðina í leikhús þar sem hún getur skoðað sjálfa sig í nútíð og fortíð í  faglegum og áhugaverðum sýningum sem auka skilning á mannlegum breyskleika.

Allar sýningar okkar eru ýmist um ungt fólk, fyrir ungt fólk eða leiknar af ungu fólki. Við fáum innsýn inní  líf unglinga á Akureyri árið 2019  sem og líf unglinga í Vín árið 1890. Við gleðjum yngstu kynslóðina með ævintýrasýningu um menningararfinn og leiklistarskóli Leikfélags Akureyrar þar sem öll grunnskólabörn eru velkomin til leiks heldur áfram sínu öfluga starfi.

Einu sinni erum við öll börn og æskunnar raunir, vonir og þrár höfða til okkar allra. Við erum stolt af því að setja unga fólkið í fyrsta sæti og bjóðum ykkur hjartanlega velkomin í leikhúsið.

Marta Nordal, leikhússtjóri