Fara í efni

Upptakturinn á Akureyri 2022

Upptakturinn á Akureyri slær taktinn á ný. Með Upptaktinum, Tónsköpunarverðlaunum barna og ungmenna, er ungu fólki gefið tækifæri til að senda inn tónsmíð eða drög að henni og vinna markvisst úr hugmyndum sínum með fulltingi listamanna. Afrakstur þeirrar vinnu má sjá og heyra á tónleikum Upptaktsins í Menningarhúsinu Hofi þann 24. apríl næstkomandi. Þar leika atvinnuhljóðfæraleikarar verkin á meðan ungmennin sitja á meðal áheyrenda.

Upplýsingar
Upptakturinn er samstarfsverkefni Menningarhússins Hofs og Hörpu. Áhersla er lögð á að hvetja börn og ungmenni til að semja tónlist og styðja þau í fullvinnslu hugmyndar. Ungmennin sem komast áfram vinna að útsetningum undir leiðsögn reyndra tónlistarmanna. Að þessu ferli loknu verða til ný tónverk sem flutt verða á tónleikum og varðveitt með upptöku.

Markmið Upptaktsins
Sköpun – að stuðla að tónsköpun ungs fólks og hvetja börn og ungmenni til að semja eigin tónlist.
Skráning – að aðstoða börn og ungmenni við að fullvinna hugmyndir sínar í vinnusmiðju og varðveita þannig tónlistina.
Flutningur – að gefa börnum og ungmennum tækifæri á að upplifa eigin tónlist í flutningi fagfólks við kjöraðstæður á tónleikum í Menningarhúsinu Hofi.

Svona tek ég þátt:

  • Upptakturinn er fyrir börn og ungmenni í 5.-10. Bekk.
  • Lengd tónverks, óháð tónlistarstíl, skal vera 1-5 mínútur að hámarki, annaðhvort einleiks eða samleiksverk fyrir allt að 6 flytjendur.
  • Skila þarf tónsmíð inn í hefðbundinni eða grafískri nótnaskrift, texta eða upptöku. Upptakan skal vera í mp3.
  • Sendist rafrænt á upptakturinn@mak.is ásamt nafni höfundar, aldri, tölvupóstfangi, grunnskóla, titli verks og verkinu sjálfu ásamt nafni forrráðamanns, símanúmeri og tölvupóstfangi.

Skilafrestur hugmynda er til og með 10. mars 2022

Dómnefnd
Dómnefndina skipar tónlistarfólkið Greta Salóme, Kristján Edelstein og Magni Ásgeirsson. Dómnefndin velur 10 verk úr innsendum hugmyndum til frekari þátttöku.

Vinnusmiðja með fagfólki
Valin verk verða fullunnin með fagfólki í tónlist.  Einstaklingsbundin vinnusmiðjan fer fram dagana 5. og 6. apríl í Menningarhúsinu Hofi og 20. apríl verður vinnusmiðja með öllum hópnum. Að því ferli loknu hafa orðið til ný tónverk.

Tónleikar
Sunnudaginn 24. apríl kl. 17 verða tónverkin flutt í Hamraborg, í Menningarhúsinu Hofi. Hljóðfæraleik og framkvæmd annast fagfólk í tónlist.

Tónlistarstjóri er Greta Salóme.

Tónsköpunarverðlaunin
Öll verkin sem flutt verða á tónleikunum hljóta tónsköpunarverðlaunin: Upptakturinn 2022.

Allar nánari upplýsingar hérna
Verkefnastjóri Upptaktsins er Kristín Sóley Björnsdóttir sem veitir fúslega allar nánari upplýsingar í gegnum upptakturinn@mak.is og í síma 450-1005.