Todmobile, Jón Gnarr og Bach um helgina

Það verður mikið um dýrðir annað kvöld í Menningarhúsinu Hofi þegar hljómsveitin Todmobile verður með tónleika sína í Hamraborg. Upprunalega þríeykið sem stofnaði Todmobile árið 1988, þau Þorvaldur Bjarni Þorvaldsson gítarleikari, Andrea Gylfadóttir söngkona og Eyþór Arnalds söngvari og sellóleikari koma saman á ný, auk þess sem núverandi meðlimir láta sig að sjálfsögðu ekki vanta. Þegar þetta er skrifað er handfylli eftir að miðum svo áhugasömum er bent á að hafa mjög snör handtök til að tryggja sér miða. 

Á sama tíma í Samkomuhúsinu verður annarskonar fjör þar sem sjálfur Jón Gnarr verður með Kvöldvöku sína. Sýningin gekk fyrir fullu húsi í Borgarleikhúsinu veturinn 2019 en engin Kvöldvaka með Jóni er nákvæmlega eins. Hvert kvöld er einstök upplifun þar sem sagnahefðin og frásagnargleðin mun ráða ríkjum. Sumar sögurnar hafa einhverjir heyrt hann segja í útvarpinu en flestar hafa aldrei heyrst áður. Miðasala er hér.

Á sunnudeginum mun Tónlistarfélag Akureyrar standa fyrir viðburðinum Sif, Hjálmar og Bach í Hömrum í Hofi. Flutt verða tvö verk fyrir einleiksfiðlu. Annars vegar Sónata fyrir einleiksfiðlu no 1 í g-moll eftir Johann Sebastian Bach sem samin var árið 1720 og hins vegar nýtt verk eftir Hjálmar H. Ragnarsson Partíta fyrir einleiksfiðlu samin árið 2020.