Þrjár Grímutilnefningar norður

Tilkynnt var um tilnefningar til Grímunnar, íslensku sviðslistaverðlaunanna í Tjarnarbíó í gær og hlaut Leikfélag Akureyrar þrjár tilnefningar. Fjölskyldusýningin Jóla Lóla var tilnefnd sem barnasýning ársins en sú sýning var samin að öllu leyti fyrir norðan og verður sýnd á ný um næstu jól. 
Birta Sólveig Söring var tilnefnd sem leikkona ársins fyrir túlkun sína á Auði í söngleiknum Litla Hryllingsbúðin sem Leikfélagið setti upp síðasta haust og bætti svo við aukasýningum um páskana vegna mikillar eftirspurnar. Síðan var Unn­ur Elísa­bet Gunn­ars­dótt­ir tilnefnd fyrir dans og sviðshreyfingar ársins fyrir Litlu hryll­ings­búðina.

Auk þess var Þórey Birgisdóttir  tilnefnd sem leikkona ársin fyrir Ífigeníu í Ásbrú en sú sýning verður gestasýning Leikfélags Akureyrar á næsta ári og þess má geta að Þórey lék stórt hlutverk í Litlu Hryllingsbúðinni . Síðan var Ævar Þór Benediktsson tilnefndur sem leikari ársins fyrir Kafteinn Frábær en sú sýning mun einnig vera gestasýning hjá Leikfélagi Akureyrar á næsta leikári.