Stórtónleikar Orkester Norden í Hamraborg

Orkester Norden efna til glæsilegra stórtónleika í Hamraborg laugardaginn 25. júlí kl. 16. Á efnisskránni eru sígild meistaraverk eftir tónskáldin Franz Schubert, Igor Stravinsky, Carl Nielsen og Ludwig van Beethoven.

Orkester Norden er eitt af helstu norrænu samstarfsverkefnum Lionshreyfingarinnar. Hljómsveitin er hvert ár skipuð 40-80 hæfileikaríkum ungmennum frá Norðurlöndunum og Eystrasaltsríkjunum sem eru sérstaklega valin til þátttöku eftir strangt inntökuferli. Að þessu sinni leika þrír ungir íslenskir hljóðfæraleikarar með hljómsveitinni, það eru þær Hanna Kristín Stefánsdóttir violuleikari, Helga Björg Kjartansdóttir violuleikari og Karen Jóna Steinarsdóttir flautuleikari.

Undanfarna viku hefur hljómsveitin verið við æfingar hér í Hofi en auk þess hafa þau leikið listir sínar víðs vegar um bæinn og glatt bæði íbúa og gesti. Orkester Norden býður gestum hjartanlega velkomna að njóta afraksturs æfinganna á glæsilegum lokatónleikum í Hamraborg.

Athugið að enginn aðgangseyrir er á tónleikana.

Lestu meira um viðburðinn hér.