Myndlist, dans og jólatónleikar um helgina

Eins og vanalega verður líf og fjör í Menningarhúsinu Hofi um helgina. Á laugardaginn opnar myndlistarkonan Jóna Hlíf Halldórsdóttir einkasýninguna Vetrarlogn. Opnunin er klukkan 14 en sýningin stendur til 9. janúar 2022.

Um kvöldið er komið að hinum stórskemmtilegu jólatónleikum  Norðurljósanna sem nú verða haldnir í sjöunda sinn í Hofi. Tónleikarnir, sem eru þekktir fyrir að vera í senn léttir og hæfilega hátíðlegir, eru geysilega vinsælir og aðeins eru örfáir miðar eftir. Tvennir tónleikar verða í ár, þeir fyrri klukkan 19 og síðari klukkan 22. Söngvarar Norðurljósanna í ár eru þau Ragnhildur Gísladóttir, Mugison, Magni Ásgeirsson, Bríet, Óskar Pétursson og Pálmi Gunnarsson.

Á sunnudeginum er komið að danssýningunni Litla ljóta jólatréð sem er frumsamið verk eftir Karen Jóhannsdóttur. Í sýningunni má sjá dansara á öllum aldri dansa við nokkur þekktustu jólalög allra tíma.

Sem sagt; myndlist, jólatónleikar og dans og því eitthvað fyrir alla í Menningarhúsinu Hofi um helgina. Svo má líka minna á BARR kaffihús þar sem hægt er að fá dásamlega jólasmáréttaplatta allar helgar í jólamánuðnum.