Chicago vann tvenn verðlaun á Grímunni og hlaut alls 7 tilnefningar!

Björgvin Franz Gíslason leikari var valinn söngvari ársins á Grímunni, íslensku sviðslistaverðlaununum,  sem haldin var við hátíðlega athöfn í Borgarleikhúsinu í gærkvöldi. Verðlaunin hlaut Björgvin fyrir söng í hlutverki sínu sem Billy Flynn í söngleiknum Chicago, sem frumsýndur var í Samkomuhúsinu í byrjun árs og gekk fyrir fullu húsi fram á vor.  Danshöfundurinn Lee Proud hlaut einnig verðlaun fyrir dans- og sviðshreyfingar ársins fyrir Chicago.

„Við erum stolt og meyr yfir glæsilegri uppskeru á Grímunni. Chicago er okkar langstærsta sýning til þessa og verðlaunin og tilnefningar mikil viðurkenning á okkar starfi. Þessi hvatning og viðtökur áhorfenda sýna að við erum á réttri leið." segir Marta Nordal leikhússtjóri LA og leikstjóri Chicago.  

Söngleikurinn Chicago hlaut alls 7 tilnefningar til Grímunnar:

Sýning ársins: Chicago

Söngvari ársins:  Margrét Eir

Söngvari ársins: Björgvin Frans Gíslason

Dans- og sviðshreyfingar ársins: Lee Proud

Dansari ársins: Katrín Vignisdóttir

Leikari ársins í aðalhlutverki; Björgvin Franz Gíslason

Leikari ársins í aukahlutverki: Arnþór Þórsteinsson

 

Menningarfélag Akureyrar óskar verðlaunahöfum til hamingju,  sem og öllum þeim sem stóðu að sýningunni og þakkar  þeim gjöfult samstarf. Sérstakar þakkir fá svo áhorfendur fyrir frábærar viðtökur.